سعيدان والدحمي من حارتهم للندن الجزء الثالث

السلام عليكم

مع أني زعلان منكم عشان ما رديتو على الجزء الأول والثاني إلا ردود قليلة لكن ايش أسوي لازم أنزل الجزء الثالث و الأخير


الفصل الرابع

اخذ سلمان الصور و وداها لخويه بالجوازات اللي ضبط له اياها بعشر دقايق..و جاك سلمان مقلع للمطار لان الطياره بتقلع بعد دقيقتين..راح ختم الجوازات و قال لسعيدان و اخوه يالله مشينا..وش بكم واقفين!!
سعيدان : وش لون نمشي و جوزاتنا ما جو!! ذولا محارم انت و وجهك..
عصب سلمان و شال ثوب الخكاره عن نفسه و شاتهم للطياره و اول ما ركبوا بدى الاخذ و عطا بين سعيدان و الدحمي..و السبة هالمره من يقعد بجمب الدريشه..

+++++++++++

بعد خمس ساعات من الطيران..التفت سعيدان لسلمان اللي كان نايم و مشغل السماعات على اغنبيه غربيه..

سعيدان : سلمان يالحبيب وش قاعد تسمع حجاب ؟!
سلمان فتح عين و غمض عين و رفع حواجبه و نزل حاجب..
سعيدان : احلى يالغمازات..تراي انت و وجهك حشران مابوه نخله هنا اتوزى به ؟

سلمان عيونه صارت تقل كبوس من الدهشة..قاله سعيدان اثر عيني قويه علقت الغمازات!!

سلمان : يا حمار وش نخلته ؟ رح للحمام يالثور تلقاه اخر الطياره ..
سعيدان : بس ما اعرف اقعد عالكرسي..
سلمان : ياخي تخيل نفسك بالمدرسه و انت قاعد عالكرسي!!
سعيدان : اصلا ما عمري قعدت بالكرسي دايما واقف..
سلمان : يا ابو الشباب على بلاطة خلك مبوبز
سعيدان : ابوبز على بلاطه..ما كان كرسي!!

سلمان و هو يصيح : رح للحمام و يدبره ربك لو تبي تسويه بمكانك انت حر فكنا الله يقلعك ..

راح سعيدان للحمام و بعد عده محاولات نجح في قضاء حاجته..ثم قام و طلع و جيبه ممتلي!!

شافه سلمان و قال وش ذا ؟ قال سعيدان ابد بس شفت علوك على البزبوز و قلت خل اخذه..

سلمان : يا غبي هذا صابون!!

انفجع سعيدان و رماه بسرعه و قال اعوذ بالله..صابون!! يعني اصير نظيف!! استغفر الله العظيم..اخاف امرض!!
الدحمي : تصدق اني تو و انا اسوي جوله اسكتشافيه بالطياره اكتشفت ان الحمام له قفل..(مدري من اللي داعية عليه امه عشان يدخل عليك).. يوم شفت القفل خفت تعجبك الاجواء الرومانسية و تقفل على نفسك و عاد وش يطلعك ..

و بينما الشباب هكذا جت المضيفه و وقفت عند سلمان و قالت بصوت ناعم : hi .. شو بدك عصير ؟

سلمان و هو مبلم : روقي المنقا و جيبي مانقا ..
عطته طلبه و راحت للدحمي اللي كان رايح وطي و قالت له بنفس الصوت الناعم : hi .. شو بدك عصير ؟

الدحمي : روقي الاترام .. و جيبي اترام ..
المضيفه : !!
التفت الدحمي على سلمان و قاله وش به ذي ؟ انت قلت له مانقا محترف الشباب و انا قلت له خويه اترام !!

سلمان : يا غبي مانقا فاكهة .. سوري لو سمحتي جيبوا له اناناس ..
عطته طلبه و راحت لسعيدان اللي كان رايح وطي و بنفس الوقت يبي يسوي نفسه اتيكيت عند المضيفه ..

قالت لهم بنفس الصوت الناعم : hi .. شو بدك عصير ؟

سعيدان و هو مستحي : جيبي بردقان الله مير يسلمتس ..
المضيفه : باردون ؟
سعيدان : ايه باردون اجل تبينن اشربه حار..
المضيفه : سوري .. بس ما عم بإفهم عليك ..

بهاللحظة تدخل سلمان و انقذ الموقف و قال : اورانج اورانج لو سمحتي ..
عطته طلبه و راحت و هي تقول بنفسه الحمد لله و الشكر..اكيد هدول من جماهير النادي السعودي اللي لونه yellow نسيت اسمه يا ربي

هبطت الطائره بسلام بمطار هيثرو بلندن .. و شال سعيدان الكيس حقه اللي كان مكتوب عليه محل ابو صالح للمشالح .. و كان موجود فيه غيار عباره سروالين سنة و فنيلتين علاق .. و نفس الكلام عند الدحمي ..

نزلوا بسرعه قبل كل الناس .. اما سلمان قعد يجيب شنطته الدوبلماسية من الدولاب اللي فوقه و يوم طلع من الطياره قعد يدور سعيدان و الدحمي .. و بعد خمس الدقايق من البحث سمع سعيدان يناديه و يوم التفت لقاه ناصب الخيمة و بيشب الضو عشان يضبط القهوه ..

قاله سلمان يا مجنون وش تسوي بحديقه المطار ؟
سعيدان : ابد بس شفت الدنيا مربعه قلت خل نخيم هنا يومين ..
سلمان : مربعه بعينك شل خيمك لا يجون رجال الامن و يقشونا .. قم بسرعه انت و الدحمي ..

قاموا الشباب و وقف سلمان اول سياره تاكسي .. و لو بليز اقرب هوتيل ..
طبعا سلمان هو الوحيد اللي كان يعرف يتكلم عنجليزي .. اما سعيدان و الدحمي فما يعرفون يتكلمون عربي عشان يتكلمون عنجليزي ..

وصلوا الفندق .. و كان من ناطحات السحاب..قال سعيدان واااااااوك وش ذا ؟ سطح بيتنا ما يوصل للبدرون حقهم !!

دخلوا الفندق و طلب سلمان غرفتين و صاله و تهاوش مع سعيدان ليش يطلب حمام قال يا رجال مع الدريشه و انتهينا .. اصلا بنرجع لديرتنا و تلقاه ما وصلت الارض

دخلوا الشقه الجديده و دخل سلمان و اخذ له شور بعدين حط جل و طلع..يوم شافه الدحمي ضحك قال ذيك المره امي حطت له زيت بطاريات بصلعتي تقول انه يطلع الشعر و ما نفع عاد اول مره ادري انه ينعم الشعر..

سلمان : اقول وين سعيدان بس ؟
الدحمي : شفه عند الجدار و معه بخاخ..

راح سلمان لسعيدان و قال هيه يالمجنون وش قاعد تسوي ؟ قال سعيدان ياخي هالبخاخ غبي لي ساعه احاول اكتب ذكريات سعيدان لكن ما يطلع شي !!!

سلمان : ايه يا غبي لان هذا مزيل عرق

طلع سعيدان من جيبه بخاخ ثاني و قال طيب هذا ليش ما يكتب ؟
قال سلمان : هذا بف باف يا غبي حق قتل الصراصير

سعيدان : و انا اقوووول ليش ريحته زينه!!


الفصل الخامس

نزلوا الشباب يتمشون في ضواحي لندن..و بينما هم على هالحال مروا من جمب ملعب الاولترافود و اذا بزحمه فضيعه..لدرجة ان سعيدان قال وش هالزحمه و الله لو انهم مجتمعين ليلة العيد على بسطة وضحا للشروخ بجميع انواعها

سئل سلمان واحد من الموجودين : لماذا هذا التجمع ؟
قال له : بعد قليل مباراة المان يونايتد و تشيلسي
قاله سلمان : ثانكس..

قال سلمان للي معه وش رايكم ندخل المباراة دامنا ما ورانا شي ؟
قال سعيدان : قدام

قطعوا تذاكر و دخلوا المباراة و دخلوا الفريقين لارض الملعب و كانت دقت البداية مع المان فأخذ كريستيانو رونالدو الكوره و سحب اثنين و مير يتهيض سعيدان و طب السور و راح للسير فيرجسون مدرب مانشستر و مسكه مع كمه و قال : شف..العب و لا اخرب ؟

رد عليه فيرجسون بالعربي بإعتباره مسلم لكن مخفي هالشي و مات شهيد بالعراق

انك لست مسجل في الفريق..عموما تبدو لاعب موهوب و تتميز بالضربات الشظافيه ..و بما ان فتره الانتقالات بقي على اقفالها ساعتين سنسجلك لاعبا جديدا بالمان يونايتد ..

قال السير فيرجسون لسعيدان كم تريد قيمة العقد ؟
قال سعيدان : عشانك عشانك رغم انه جتني عروض من ضمك و الوطني لكن عشانك ابطنشهم و اوقع معك بس بشرط ابي مقدم عقد علكين من علوكك و مؤخر علك واحد و اذا حصل طلاق الله ييسر علينا يا وخيتي

ضحك السير فيرجسون بينه و بين نفسه و قال وش هالمخفه..بعدين قاله بصوت عالي حسنا اتفقنا..تبي العلك مستعمل و لا عالزيرو ؟

سعيدان : لا وش مستعمل الله يحوم تسبدك شكلك من يوم ما استلمت تدريب مانشستر قبل 25 سنة ما غيرت العلك..اول مره اشوف واحد حالف ما يرمي العلك الا اذا قضا

راح سعيدان و قالوا له وقع عالوثيقه لكنه قال ما اعرف اوقع..قالوا له طيب ابصم..طلع ابهامه اكبر من الورقه!! يا لييييييييل ..
بالنهاية رسم عصفور و قال خلاص ذا توقيعي..

عطوه شورت و فنيله..قال سلامات تبونن البس الشورت ؟ ياخي فيه حريم بالملعب اخاف ينفتنن بكراعيني

و بعد شد و جذب اقتنعوا مسؤولين النادي انه يلبس سروال سنة..و فانيله مانشستر..

يوم جاء يروح الملعب..قالوا دقيقه البس كنادر..قال معصي ما بقا الا هي و الله ما العب الا حفيان..

قالوا يا مستر سعيدان ما يصير..قال يا شيخ حل عن ما اعرف العب بالكنادر شرط لو لبسته و صوبت عالمرمى بدال ما اجيبه بالعارضه..بلوحه الاعلانات عالاقل!!
ابجيبه براسه فيرجسون و يطيح علكه و يتوطى ببطني ..قالوا له شورك و هداية الله يالله رح تشيلسي جاب التعادل و ترى الشوط الاول انتهى..

راح لغرفه الملابس و لقا اللاعبين و فيرجسون..قاله المدرب سعيدان املنا فيك كبير نبيك تجيب هدف الفوز..

و خذ اقرا الخطة ابيك تطبق المطلوب منك .. قاله سعيدان اقول حل بس ما اعرف غير اطب بالملعب و متى ما جتن الكوره امشي على عماه و اقول يا رب

بهاللحظة جاهم الحكم الرابع و قال يالله الشوط الثاني بيبدأ .. نزلوا اللاعبين و مقدمتهم سعيدان وسط صيحات الاستهجان من الجماهير و ذلك لاخراج روني لاجل هالمخزي سعيدان !!

لكن شائعه سرت في المدرجات ارضت الجماهير..و هي ان احدهم قال ان سعيدان ولد اخت رونالدينهو و اذا منتم مصدقين شوفوا ضروسه



بدأ الشوط الثاني و كانت الكره من كريستيانو الذي لعبها بكعبه عاليه ناحية سعيدان الذي بادر بإرجاعها له بضروسه على طريقه ون تو ..

ثم سحب رونالدو معه لاعبين و ذهب بإتجاه الركنيه و رفعها عاليه ليرتقي عليها سعيدان و يضربها بضروسه لتدخل الكووره قول ..

ففرح سعيدان كثيرا لكنه فوجئ بالحكم يلغي الهدف .. و ذلك بسبب ان الكوره انفقت قبل ما تاصل للمرمى..الله يهديك يا سعيدان ذي موب ضروس ذي سكاكين

ذهب سعيدان ليسطر الحكم لكن اللاعبين هدوه و قالوا له خيرها بغيرها يا خلفهم..

و عاد اللعب من جديد و بكره منظمة من لامبارد و جو كول سجل البلوز الهدف الثاني لتصبح النتيجة 2-1

و في هذه اللحظة بكت فتاه مانشستراويه شقراء..و صاحت بأعلى صوتها : سعيدااااااااااااااااااااان ارجوك انجدنا

فهبت طاقه عجيبه بسعيدان فأخذ الكوره من السنتر و تلاعب بجميع لاعبي البلوز ليسجل التعادل و هكذا استمر بتسجيل الاهداف ..

الا ان بكت الفتاه الشقراء مره اخرى و قالت سعيداااااااااان ارجوك قف انني معلمة رياضيات لكنني لم استطع قراءه العدد ايها الكريزي

توقف سعيدان و اعلن الحكم نهاية المباراة بفوز المان على تشيلسي ..

++++++++++

بس هذا المستوى لسعيدان اشتهر بين وكالات الانباء و صار كل من شافه كل ابي توقيعك عاد سعيدان يرسم له عصفور لدرجة انه مره وقع لواحد على فنيلته من ورى ..
فكل من شاف هالواحد قال هيه ترا فنيلك مقلوبه..يحسبون العصفور ماركة زي فرنسا و الديك ..

بعد ما اشتهر اجتمع رئيس المافيا مع رئيس الموساد..و قال اراهن بمليون جنيه استرليني ان سعيدان المباراة الجاية موب مسجل هدف..قال رئيس الموساد اراهن بمليونين انه بيسجل..

قالوا رئيس المافيا جاك روبنسون : اوكي اتفقنا انت و وجهك.. <--- لزوم العربجه

بعد ما راح رئيس الموساد..نادى جاك واحد من عملائه و قاله شف اللاعب سعيدان ابيك تطيحه بالخمر و النساء قبل ليلة المباراة لين يروح للمباراة تبعان و ما يعرف يلعب..

العميل : حاضر سيدي..اعتبر الامر قد تم..

الفصل السادس

كان سعيدان ال بيكاسو قاعد ببهو الفندق يرسم العصافير..لين جته وحده تطير الطير من السما و لابسه من غير هدوم..و قعدت تمايل وتغنج و قالت له ممكن اكلمك لوحدك ؟

سعيدان بحسن نية : شوفي انا لاعب كوره..رسام..مزارع بمزرعه جدي..لكن ماني مصلح اجتماعي اذا كنت متهاوشه مع زوجك

البنت : تعال انت و تفهم كل شي..مشى سعيدان و قعدوا بغرفه جانبيه..و صبته له قليلا من النبيذ فقالت وش ذا زيت خروع ؟

قالت له : شف..تراهم ارسلون لك عشاني عربيه زيك و اعرف اتكلم معك..الحين تراني بديت اشك اني اعرف عربي..هذا خمر وش زيت خروع..

سعيدان : اه يالوصخه انقلعي ما اشرب خمر و عرفت وش تبين يالله انقلعي.. <--- يا ثقيييييييل ..

مشى و طنشها و هي تناديه..فضغطت زر لين جاها العميل..قالت له الخطة الاولى لم تنفع معه..اذهب للخطة الثانيه..

طلع سعيدان لشقته و طلع سروال سنة و خلاه مخده و سروال سنة لحاف.. و بينما هو يشاخر سمع صوت حصاه تضرب بالدريشه..

قال : انتي لاحقتن حتى و انا بناطحات السحاب!!
فتح الدريشه و شاف هليكوبتر واقفه قدامه و معهم سلمان..و العميل ماسكه مع قذلته لكن كل شوي تزلق ايده من الجل لين مل و مسكه مع فنيلته..و بنفس الوقت كان حاط مسدس على راس سلمان..و قال شف اذا سجلت هدف بالمباراة الجاية بنذبح خويك..و اذا ما سجلت بنرجعه لك بعد المباراة..سلاااااام,,

و رحلت الهليوكوبتر..فقوم سعيدان الدحمي بسرعه و نزل بسروال سنة وفنيله مع الدرج لان الصرنصير على قولته و قولة مناحي بطيء..

يوم وصل شاف الهيلوكوبتر و هي تروح..وقف اول سياره تاكسي و ركب هو و الدحمي..و قالوا للسواق الحق الهيلوكوبتر..
مشى السواق وراها لين طلعوا برا المدينه و نزلت الهيبلوكوبتر عند احد الجبال..نزل سعيدان و الدحمي و ركضوا لم مكان الهيلوكوبتر..

و شافوا العميل ينزل سلمان مع شوشته..التفت سعيدان على الدحمي و قال ما شاء الله متى نبت لك شعر ؟

الدحمي : يا غبي ذي باروكه لقيته عند التاكسي و سرقته..قلت عشان ما يعرفونن تعرف الشهره له عمايله..

و بينما هم كذا الا سمعوا صوت وراهم يقول " لقيتكم " !!
و مير يصرخ سعيدان..و جاء العميل يركض بيشوف وش فيه..اثره سواق التاكسي جاي بياخذ قيمة التوصيله من سعيدان و الغبي سعيدان فضح نفسه بالصرخه

يوم شاف سعيدان العميل هج و ركض وراه العميل لين حشره عند الزاويه..و اطلق عليه رصاصه!!

و جت بمنتصف الشظاف..و سقطت شظاف سعيدان ارضا!!فلما رأها هكذا اصيب بنوبة من الغضب و احس بقوه عظيمة..

فأنهال باللكمات على المسكين العميل..و على حراسه الشخصيين حتى طاحوا كلهم تحت قدميه!!

فجاء سلمان فرحان و شد وثاق المجرمين و دق عالشرطه و جت و القت القبض عليهم..و بينما هم هكذا جاء مدير شرطة لندن لسعيدان و قاله:-

شكرا لك فقد القيت القبض على اخطر عصابه في لندن!!

ناظره سعيدان بنظره كسيره و ذلك لفراق شظافه .. ثم رحل هو و الدحمي و سلمان!!



الفصل السابع

بعد يومين من الحادث ..
سلمان : سعيدان الدحمي تجهزتوا لحفل التكريم ؟
الدحمي : انا لبست باروكتي و سعيدان بدى يتأقلم مع الوضع بدون شظاف!!
سعيدان : ايه و الله..يالله قوه لحفل التكريم..

مشوا للحفل و جاء عمده مدينة لندن و اهدى سعيدان وسام الشجاعه الاولى الذي كان عباره عن ميداليه ذهبيه..

و يوم جاء سعيدان يلبسه خنق نفسه لين خلصوه قبل خلاص الروح ..و اعطوا الدحمي باروكه احسن من اللي معه..اما سلمان فعطوه سطل جل ..

و ودوهم للمطار عشان يرجعون للسعوديه و لا على حساب الدولة بعد..
و اول ما ركبوا..ابتدى الاخذ و عطا !! على ايش ؟ على الدريشه كالعاده ..

+++++++++

هبطت الطائره بسلام عائدة الى ارض الوطن..و راح سعيدان و الدحمي لبيتهم..
و دخلوا الصاله و شافهم ابوهم!!سعيدان بدون شظاف و الدحمي طلع له شعر!!
قال ما شاء الله تبارك الله..من جد هالنبع يشيل العاهات ..ما ودكم تدلونن عليه اغدي اميمتكم ترجع شباب..

الام : واااااااخزياه يا سليمان!!

سعيدان و الدحمي : ههههههههههههههههههه و جو حبوا راس ابوهم و امهم طبعا ابو سعيدان بدال ما يحفر سعيدان حفره براسه بسبة ضروسه هالحين بدى يملى راسه سعابيل ..

ردودكم أنتظرها