سعيدان والدحمي من حارتهم للندن الجزء الثاني

السلام عليكم و رحمة الله و بركاته ..

بسم الله الرحمن الرحيم و الصلاة و السلام على اشرف الانبياء و المرسلين , نبينا محمد و على اله و صحبه اجمعين ...... تحترونن اقول اما بعد ؟ لا معصي .. و لا عدوان الا على الظالمين , بسم الله الاول و الاخر و الظاهر و الباطن .. بسم الله الذي لا اله وحده .. اما بعد :

العقعاع و عمروا من حارتهم للاندلس !! ( وش اسوي تحمست مع هالمقدمة ) ..

في البداية اسف عالتاخير بإنزال الجزء الثاني .. عارف انكم متحمسين ( المثل يقول واثق الخطوه يمشي ملكا .. لكن انا من زود الثقه ما اقول غير : واثق الخطوة يركض ملكا موب يمشي ) ..

عموما ..

هذا ملخص بسيط للي صار منذو مبطي بالجزء الاول //

تعرف سعيدان و الدحمي على صديق سوء اسمه سلمان .. و خلاهم يقعون بحب مذيعه صومالية .. و بعدم انتباه انسدح سعيدان على الارض .. و مير يصقع كوعه بالجهاز !! و مع الصقعه لخبط ارقام و طلعت قناة اسمه ام بي سي 2 .. و طلعت ممثله بريطانية !! و وقع سعيدان و الدحمي بحبها و سقطوا عالارض مغشيا عليهم ( الريموت طبعا عطاكم عمره ..زين ان سعيدان ما كملها بكوعه و سوى حفرة بالارض )

( واااااااااه .. موضوعي ذاك سبعطش مليون سطر و الملخص حقه 7 سطور .. يعني سطعش مليون و 999 الف و 993 سطر كله فلسفه بفلسفه )


الجزء الثاني راح اقسمه لعدة فصول ..عشان نسهل عليكم القراءه ايها الشعب السوداني الشقيق..

و اللي يبي يقرا الجزء الاول كامل يضغط :: هنا ::



الفصل الاول


سلمان يوم شاف الاثنين طاحوا بالارض انفجع.. و قال وش السوات..
و بعد تفكير عميق قال لقيته .. سحب شراب سعيدان و حطه عند خشمه عشان يستنشقه .. و ما درى الا و سعيدان يطمر من مكانه و يصقع راسه بالجدار و يرجع تقل هجمة مرتده !!

سعيدان : خبل انت .. انت تدري وشل لون صنعوا قنبله هيروشيما ؟ تراهم بس اخذوا النكهة حقت شرابي و حطوّه بالقنبله.. بس النكهة سوت كذا وش لون تلزقه بخشتي !!

سلمان : انا اشهد انك صادز .. لعنبوا ابليسك تقل واحد ضاربن ايدي بكريك يوم شلت شرابك !! و الحين وش لون نقوم الدحمي ؟

سعيدان : الدحمي قام من قوة صرختي يوم شميت الشراب

الدحمي بعد ما صحصح : شفتوا اللي شفته يا شباب ؟ وراه ما نروح لهالبريطانيا و نشوف هالبني

سلمان : و الله لو تبيع ما وراك و قدامك ما حجزت تذكرة للندن

سعيدان : اصلا من يقول ان حنا نبي نروح بالطياره .. الله يخلي البعارين ..

سلمان : تحسب نفسك بتروح الرياض انت و خشك !! ذي دولة بعيدة .. و بطريقها في بحار و محيطات وش لون نبي نمر به بالبعير ؟

الدحمي : سهله .. نلبسه طفاشات

سلمان : اقول كولوا تبن .. اللي يسمعنا يقول البعير بيمشي خطوه وحده .. اول ما تطلعون فوقه يا ثيران شرط لا تشوفونه بجمعيه رعاية المعاقين

بعد خمس دقايق من الصمت قال سعيدان لقيته .. خل نروح للبنك بالليل و ناخذ حاجتنا من الفلوس عشان نشري تذاكر .. سكتوا الشباب شوي و الظاهر ان الفكره جازت لهم .. اتفقوا عالخطة و قالوا الوعد الساعه 12 بالليل !!

^

مافيا منفوحة


+++++++++++++

حب سعيدان و اخوه راس ابوهم بعد صلاه العشاء و طلعوا فوق ينامون .. و اتفقوا ان سلمان هو اللي يقومهم عشانه يقول ان عنده اختراع اسمه المنبه ,, !!

جت الساعه 12 و الشباب يشاخرون و الليلة القمر مكتمل و ما يشوبة الا انعكاس شظاف سعيدان عليه .. و مع غمره الشخير حس سعيدان ان فيه شي حك رجله .. حسبه ذبانه و يوم ناظر لقاه طوبة ..

ناظر من فوق لقا سلمان يحتريه .. قوم اخوه و نزلوا تحت بدون ما يحس احد ..

ما امداهم ياقفون عند سلمان الا و الحمار قعد ينهق !! حاولوا يسكتونه عجزوا ..
فأخذ سلمان سعيدان ورى النخله عشان ما يشوفه الحمار .. و الغريب انه سكت !!

بعد ما راحوا سأل سعيدان سلمان الحمار ليش سكت يوم رحت !!

قال سلمان ببساطة //


لإنه اذا شاف الشيطان نهق و انت يوم شاف شظافك شبه عليك






الفصل الثاني

وقفوا جماعة الربع قدام البنك .. و قال سلمان " شوفوا قدام البوابة حارسين خل نروح نسوي نفسنا نمشي من قدامهم و هم يبي يسألوننا وش تسون عاد انتم طلعوا أي صرفة " ..

مشوا الشباب و مروا من قدام الحارسين .. كانوا مصاريا لابسين بدلة و كرافيته ..

قال الاول : بتعملوا إيه هنا ؟

رد سعيدان : ابد بس كورتنا تقمزت جوا و نبي نجيبه
الحارس : تستعبط ! هوّه فيه حد يلعب كوره بالليل ..
سعيدان : ايه اللي بكوبا اميركا !
الحارس : شارب حاقه ؟
سعيدان : شارب شاي باللبن .. لازم تحرجونا يعني .. ليه هما منعوه ؟ ( المقطع كله مسروق ) ..
الحارس : اقول غور عن وشي .. حاسب انا من الصعيد و اشرب من دمك ..

ما امداه يكمل كلامه الا سعيدان يرفسه مع سنونه رفسه عشان يوريه ان الله حق لو انه هو اللي اكلها كان رجعت سنونه مترين ورى <<=== يعني رجعت لمكانه الطبيعي..

أسرع الدحمي يمسك الحارس الثاني و سعيدان يمسك الاول و سلمان زعلان بدلته الجديده توصخت من الغبار <<=== بزمان اول مابوه بدله يا بعدي .. اللي ما يلبس ثوب و شماغ يعتبر فعل شي محرم ( بإستثناء وقت النوم فسروال السنة و الفنيلة العلاق مستحبة ) ..

قال سعيدان لـ الحارس الاول : افتح الباب لأغولك
الحارس : ياخي اسمي حارس .. كيف عايزني افتح لك الباب .. عايز تسجل فيني قون " قول " ! يا دي النيله .. انا ابن خالة عصام الخضري بالرضاع !

قال سعيدان : اقول اسكت و كل تبن .. و سحب الكرافيتا اللي حاطه المصري ..


و قطعها من النص بضروسه .. و ربط الحارسين ..


دخلوا جوا البنك و شافوا الخزانة بوجيههم .. المشكلة وش لون يفتحونه لان عليه اقفال
تقدم سعيدان و قال خلوها خلوها <--- شاعر محاوره على غفله
قاله سلمان /

-وش لون تبي تفكه يالذهين ؟
-عيب عليك .. انا يلقبونن نقار الخشب .. شف انت بس و تعلم

سحب سعيدان براطمه اللي تقل شراع .. و طلع شظافه و قعد ينشر بالخزينة لين انفتح الباب



الفصل الثالث

شال الدحمي الفلوس و راحوا لمزرعة ابو سعيدان .. اما سعيدان قعد يراقب لهم الطريق .. شغل مخابرات سعيدان ..

وصل سلمان و الدحمي للمزرعه .. و قال سلمان وين نغبي القروش ؟!
سلمان : خل نحفر حفره عند حدى هالنخل و نغبيه يمكن بعدين بدال ما ابلع عبس ابلع ريالات ..

حفروا الحفره و حطوا الفلوس..و بعد شوي جاهم سعيدان و قال " وين غبيتوا القروش ؟! " <--- سعيدان هولمز في فلم بوليسي جديد .. سعيدان الذي ترك عالم المخابرات و اتجه للافلام البوليسيه
قالوا له عند النخل .. قال اشوى شكله بدال ما تطلع تمر بتطلع ريالات ..
سلمان : انت و اخوك فكرتوا نفس التفكير..بس لاحظت ان كلكم قلتوا ريالات ما قلتوا خمسميات مثلا..و هذا يدل على انكم وجيه فقر..

+++++++++++

قام سعيدان و الدحمي الصبح و قالوا يبه موصوفتن لنا نبع بالحسا يقولون تداوي العاهات..يعني تعدل ضروسي و ينبت شعر بصليعه دحمي الدين زيدان ..

قال ابوهم خير ان شاء الله روحوا يا عيالي الله يوفقكم .. و انا ابشركم بتروح عاهاتي و انا بمكاني..

سعيدان : وش لون يبه ؟!
الابو : ابد بس قبل دقيقتين قالوا لي عاهاتي اننا بنروح الحسا..
سعيدان : سبحان الله..يعني عيونك اللي تقل عيون بقره تكلمت و قالت ابروح الحسا ؟!

صك الابو سعيدان بالعقال و قال انقلع باللي ما يردك يا تسلب الهمل تفو عليك..مشى سعيدان و اخيه كسيرين الخاطر..و اتجهوا الى المزرعه فلقوا سلمان مطلع الفلوس و جايب التذاكر و قال لهم يالله بسرعه لا تفتوتنا الطياره باقي ساعه عالاقلاع..

و هم ماشين قابلوا دريول الحاره السلمي و قالوا له وقف .. قال السلمي يا ليل تراي امس نافخ الكفرات و معدل الصدام و الله لو تلمسون شي لالعن خيركم !!

سعيدان : لا منب لامسين شي بس نبيك تودينا المطار..
السلمي : عجيب تبي تروح عقله الصقور بالطياره !!

ما رد عليه سعيدان لكن قعد يتهاوش مع الدحمي من يركب قدام..و بعد اخذ و عطى..(اخذ و عطى من البقوس طبعا )..زعل الدحمي و ركب بالشنطة..و مشوا للمطار!!

++++++++

اول ما وصلوا قال سلمان اقعدوا بقاعه الانتظار و انا ابروح اقص البوردينق..قال الدحمي قال خلن اروح اقصه عنك ..

سلمان : تعرف تقص البوردينق ؟!
الدحمي : ايييه كل يوم بعد الغداء محد يقطعه لابوي غيري..و احيانا سعيدان يقطعه بشظافه..

سلمان : وش يجيب البودينق لبيتكم ؟!
الدحمي : يا رجال عندنا بوردينق و تفاح و موز بس اكثر شي ناكله الموز..ابوي يقول يمكن لانكم قرود..

الدحمي يقول لسعيدان : تهقى ليش عطان ظهره ؟
سعيدان : نسيت اننا متزاعلين..
الدحمي : ايه صح انزلع يا تسلب و الله لاغولك و انت نايم..

بعد خمس دقايق جاء سلمان و قال يالله خل نطلع الطياره..بس عطونا جوازاتكم..

سعيدان : وش الجواز ؟ جوز حمام و جوز زبيريات !!
سلمان : يا غبي دفتر به صورك و بعض الاختام..ما يمديك تسافر برى الا و هو معك..
سعيدان بعد ما رفع راسه و ابرز ضروسه لتفوح رائحة المرقوق حق امس ..
-اييييييه عرفته اسمه يا غبي بطاقه احوال .. خذ بطاقتي و ترى الدحمي توه بزر ما طلع بطاقه..




سلمان و هو شوي و يصيح : اه يالمخفات ما معكم جوازات وش لون بنسافر الحين ؟!

سعيدان : اذا مصمم نتجوز ترى ما عندي مانع اتزوج حصيصه ام الذبان بس شرط ابيك تقنعه ما ننام مع البقره..و اذا وافقت مستعد اتزوجه و نجيب ولد " أد الدنيا " على قولة المصاريا اللي ربطناهم قدام البنك .. و يصير دكتور معروف !!

سلمان : ايييه و وش تبي تخصصه بعد يا مزيون ؟
سعيدان : ابيه دكتور بيطري عشان اذا مرضت اروح اتعالج عنده..
سلمان : قسم ان الكلام معك فارغ الجوازات بجمب المطار خل نطلع لك جواز قبل الاقلاع لان عندي واسطة..

الدحمي : ما شاء الله..متى الملكة ؟!
الدحمي و هو ملتفت على سعيدان : تهقى هالمره ليش عطان ظهره ؟!
سعيدان : نسيت اننا متزاعلين؟!

+++++++++

طلع سلمان بيجره عشان يكلم خويه اللي بالجوازات و بعد شوي دق عليه خويه و قاله سلمان ان الدعوه كذا و كذا.. قاله خويه ما عليك بس ارسلي صور اربع بستة لهم..

قال سلمان دقايق و تكون عندك و سكر الخط..بعدين التفت لسعيدان و قال تعالوا خل نصوركم..

سعيدان : طيب عطن علك
سلمان : من وين لي ؟!
سعيدان : يالنصاب وشو اللي تو مطلعه..
سلمان : هذا بيجر يا غبي..اصلا الشرهة علي ان اكلمك امش قدامي لمحل التصوير يالثور..

راحوا لمحل التصوير و بعد 556 صوره قدر المصور يجيب صوره صح لهم..لانهم يا يغمضون عيونهم يا يسون انفسهم حولان يا يجي واحد من ورى راس الثاني و يمد الوسطى و السبابه..و على هالحال !!

قال سلمان للمصور ابي الصور مستعجل..قال المصور طيب اصبر 10 دقيقه..
سلمان : ليش ؟!
المصور : هادا فيه سنون كبيييييير مافي إقدر حمض صوره سريع سريع!!
سعيدان : يا رجال موب لازم تحمضه..اصلا سنوني بتجيك تلقائيا بيضاء بالصوره..

التفت سعيدان عالدحمي و قال : تهقى ليش عطان ظهره ؟
الدحمي : نسيت اننا متزاعلين..النتيجة الحين 2/1 ..

بسبب عدم كثرة الردوود لن أكمل القصة فخلو ردودكم أكثر من المرة الماضية عشان أكمل القصة في أقرب وقت

و إن شاء الله تكون القصة إلى الآن ممتعة

انتظرونا في الجزء الثالث

سلملم

ههههههه جميل

نتمنى إنك تكملها بأسرع وقت

أنا زعلان لأنكم ما رديتو على الموضوع وحتى المواضيع الثانية ما تردون علي ليش كذا ويييييييا وييييييييا

خلاص ولا يهمك انا بر د على كل مواضيعك

بس اول شي لازم تكمل القصة